ทุม กํสวรุตฺตมพฺยคฺฆมิคา, มณโย มณิ สาลุกมวฺหยโน;
อนุสาสนิโยปิ จ มจฺฉวโร, มณิกุณฺฑลเกน กิเรน ทสาติฯ
5. กุมฺภวคฺโค
291. สุราฆฏชาตกํ (2-5-1)
[121]
สพฺพกามททํ กุมฺภํ, กุฏํ ลทฺธาน ธุตฺตโก;
ยาว นํ อนุปาเลติ, ตาว โส สุขเมธติฯ
[122]
ยทา มตฺโต จ ทิตฺโต จ, ปมาทา กุมฺภมพฺภิทา;
ตทา นคฺโค จ โปตฺโถ จ, ปจฺฉา พาโล วิหญฺญติฯ
[123]
เอวเมว โย ธนํ ลทฺธา, ปมตฺโต [อมตฺตา (สี.), อมตฺโต (ปี.)] ปริภุญฺชติ;
ปจฺฉา ตปฺปติ ทุมฺเมโธ, กุฏํ ภิตฺวาว [กุฏํ ภินฺโนว (สี. ปี.), กุฏภินฺโนว (?)] ธุตฺตโกติฯ
สุราฆฏ [ภทฺรฆฏ (สี. ปี.), ภทฺรฆฏเภทก (สฺยา.)] ชาตกํ ปฐมํฯ
292. สุปตฺตชาตกํ (3-5-2)
[124]
พาราณสฺยํ [พาราณสฺสํ (สี. ปี.)] มหาราช, กากราชา นิวาสโก [นิวาสิโก (สี. ปี.)];
อสีติยา สหสฺเสหิ, สุปตฺโต ปริวาริโตฯ
[125]
ตสฺส โทหฬินี ภริยา, สุผสฺสา ภกฺขิตุมิจฺฉติ [มจฺฉมิจฺฉติ (สี. ปี.)];
รญฺโญ มหานเส ปกฺกํ, ปจฺจคฺฆํ ราชโภชนํฯ
[126]
เตสาหํ ปหิโต ทูโต, รญฺโญ จมฺหิ อิธาคโต;
ภตฺตุ อปจิติํ กุมฺมิ, นาสายมกรํ [มกริํ (สี. นิสฺสย)] วณนฺติฯ
สุปตฺตชาตกํ ทุติยํฯ
293. กายนิพฺพินฺทชาตกํ (3-5-3)
[127]
ผุฏฺฐสฺส เม อญฺญตเรน พฺยาธินา, โรเคน พาฬฺหํ ทุขิตสฺส รุปฺปโต;
ปริสุสฺสติ ขิปฺปมิทํ กเฬวรํ, ปุปฺผํ ยถา ปํสุนิ อาตเป กตํฯ
[128]
อชญฺญํ ชญฺญสงฺขาตํ, อสุจิํ สุจิสมฺมตํ;
นานากุณปปริปูรํ, ชญฺญรูปํ อปสฺสโตฯ
[129]
ธิรตฺถุมํ อาตุรํ ปูติกายํ, เชคุจฺฉิยํ อสฺสุจิํ พฺยาธิธมฺมํ;
ยตฺถปฺปมตฺตา อธิมุจฺฉิตา ปชา, หาเปนฺติ มคฺคํ สุคตูปปตฺติยาติฯ
กายนิพฺพินฺท [กายวิจฺฉนฺท (สี.), กายวิจฺฉินฺท (ปี.)] ชาตกํ ตติยํฯ
294. ชมฺพุขาทกชาตกํ (3-5-4)
[130]
โกยํ พินฺทุสฺสโร วคฺคุ, สรวนฺตาน [ปวทนฺตาน (สี. ปี.)] มุตฺตโม;
อจฺจุโต ชมฺพุสาขาย, โมรจฺฉาโปว กูชติฯ
[131]
กุลปุตฺโตว ชานาติ [กุลปุตฺโต ปชานาติ (สฺยา. ก.)], กุลปุตฺตํ [กุลปุตฺเต (สี. ปี.)] ปสํสิตุํ;
พฺยคฺฆจฺฉาปสรีวณฺณ, ภุญฺช สมฺม ททามิ เตฯ
[132]
จิรสฺสํ วต ปสฺสามิ, มุสาวาที สมาคเต;
วนฺตาทํ กุณปาทญฺจ, อญฺญมญฺญํ ปสํสเกติฯ
ชมฺพุขาทกชาตกํ จตุตฺถํฯ
295. อนฺตชาตกํ (3-5-5)
[133]
อุสภสฺเสว เต ขนฺโธ, สีหสฺเสว วิชมฺภิตํ;
มิคราช นโม ตฺยตฺถุ, อปิ กิญฺจิ ลภามเสฯ
[134]
กุลปุตฺโตว ชานาติ, กุลปุตฺตํ ปสํสิตุํ;
มยูรคีวสงฺกาส, อิโต ปริยาหิ วายสฯ
[135]
มิคานํ สิงฺคาโล [โกตฺถุโก (สี. ปี.), โกฏฺฐุโก (สฺยา.)] อนฺโต, ปกฺขีนํ ปน วายโส;
เอรณฺโฑ อนฺโต รุกฺขานํ, ตโย อนฺตา สมาคตาติฯ
อนฺตชาตกํ ปญฺจมํฯ
296. สมุทฺทชาตกํ (3-5-6)
[136]
โก นายํ [โก นฺวายํ (สฺยา.)] โลณโตยสฺมิํ, สมนฺตา ปริธาวติ;
มจฺเฉ มกเร จ วาเรติ, อูมีสุ จ วิหญฺญติฯ
[137]
อนนฺตปายี สกุโณ, อติตฺโตติ ทิสาสุโต;
สมุทฺทํ ปาตุมิจฺฉามิ, สาครํ สริตํ ปติํฯ
[138]
โส อยํ หายติ เจว, ปูรเต จ มโหทธิ;
นาสฺส นายติ ปีตนฺโต, อเปยฺโย กิร สาคโรติฯ
สมุทฺทชาตกํ ฉฏฺฐํฯ
297. กามวิลาปชาตกํ (3-5-7)
[139]
อุจฺเจ สกุณ เฑมาน, ปตฺตยาน วิหงฺคม;
วชฺชาสิ โข ตฺวํ วามูรุํ, จิรํ โข สา กริสฺสติ [สริสฺสติ (ก.)]ฯ
[140]
อิทํ โข สา น ชานาติ, อสิํ สตฺติญฺจ โอฑฺฑิตํ;
สา จณฺฑี กาหติ โกธํ, ตํ เม ตปติ โน อิทํ [โน อิธ (สี. สฺยา. ปี.)]ฯ
[141]
เอส อุปฺปลสนฺนาโห, นิกฺขญฺจุสฺสีสโกหิตํ [นิกฺขมุสฺสีสเก กตํ (สี. ปี.), นิกฺขญฺจุสฺสีสเก กตํ (สฺยา.)];
กาสิกญฺจ มุทุํ วตฺถํ, ตปฺเปตุ ธนิกา ปิยาติ [ธนกามิยาติ (สฺยา. ปี.), ธนกามิกาติ (สี.)]ฯ
กามวิลาปชาตกํ สตฺตมํฯ
298. อุทุมฺพรชาตกํ (3-5-8)
[142]
อุทุมฺพรา จิเม ปกฺกา, นิคฺโรธา จ กปิตฺถนา;
เอหิ นิกฺขม ภุญฺชสฺสุ, กิํ ชิฆจฺฉาย มิยฺยสิฯ
[143]
เอวํ โส สุหิโต โหติ, โย วุฑฺฒมปจายติ;
ยถาหมชฺช สุหิโต, ทุมปกฺกานิ มาสิโตฯ
[144]
ยํ วเนโช วเนชสฺส, วญฺเจยฺย กปิโน กปิ;
ทหโร กปิ [ทหโรปิ ตํ น (สี. ปี.), ทหโรปิ น (สฺยา.)] สทฺเธยฺย, น หิ ชิณฺโณ ชรากปีติฯ
อุทุมฺพรชาตกํ อฏฺฐมํฯ
299. โกมารปุตฺตชาตกํ (3-5-9)
[145]
ปุเร ตุวํ สีลวตํ สกาเส, โอกฺกนฺติกํ [โอกฺกนฺทิกํ (สี. สฺยา. ปี.)] กีฬสิ อสฺสมมฺหิ;
กโรหเร [กโรหิ เร (ก.)] มกฺกฏิยานิ มกฺกฏ, น ตํ มยํ สีลวตํ รมามฯ
[146]
สุตา หิ มยฺหํ ปรมา วิสุทฺธิ, โกมารปุตฺตสฺส พหุสฺสุตสฺส;
มา ทานิ มํ มญฺญิ ตุวํ ยถา ปุเร, ฌานานุยุตฺโต วิหรามิ [ฌานานุยุตฺตา วิหราม (สี. ปี.)] อาวุโสฯ
[147]
สเจปิ เสลสฺมิ วเปยฺย พีชํ, เทโว จ วสฺเส น หิ ตํ วิรูฬฺเห [เนว หิ ตํ รุเหยฺย (สี. ปี.), น หิ ตํ วิรูเห (?)];
สุตา หิ เต สา ปรมา วิสุทฺธิ, อารา ตุวํ มกฺกฏ ฌานภูมิยาติฯ
โกมารปุตฺตชาตกํ นวมํฯ
300. วกชาตกํ (3-5-10)
[148]
ปรปาณโรธา [ปรปาณฆาเต (สฺยา.), ปรปาณโรจํ (ก.)] ชีวนฺโต, มํสโลหิตโภชโน;
วโก วตํ สมาทาย, อุปปชฺชิ อุโปสถํฯ
[149]
ตสฺส สกฺโก วตญฺญาย, อชรูเปนุปาคมิ;
วีตตโป อชฺฌปฺปตฺโต, ภญฺชิ โลหิตโป ตปํฯ
[150]
เอวเมว อิเธกจฺเจ, สมาทานมฺหิ ทุพฺพลา;
ลหุํ กโรนฺติ อตฺตานํ, วโกว อชการณาติฯ
วกชาตกํ ทสมํฯ
กุมฺภวคฺโค ปญฺจโมฯ
ตสฺสุทฺทานํ –
วรกุมฺภ สุปตฺตสิริวฺหยโน, สุจิสมฺมต พินฺทุสโร จุสโภ;
สริตํปติ จณฺฑิ ชรากปินา, อถ มกฺกฏิยา วกเกน ทสาติฯ
อถ วคฺคุทฺทานํ –
สงฺกปฺโป ปทุโม เจว, อุทปาเนน ตติยํ;
อพฺภนฺตรํ ฆฏเภทํ, ติกนิปาตมฺหิลงฺกตนฺติฯ
ติกนิปาตํ นิฏฺฐิตํฯ
4. จตุกฺกนิปาโต
1. กาลิงฺควคฺโค
301. จูฬกาลิงฺคชาตกํ (4-1-1)
[1]